تخيل
لو قالتلك بحبك
اسفة ان انا مفهمتكش من الاول
او كنت فاهمة بس بحاول ابعد
بس انت كنت فى بالى
كنت بتاخد انطباع ان انا مش بحبك
وان عمرى ما هحبك بس انا فعلا بحبك
مش عارفة انا ازاى قدرت اخبى كل الوقت دة
وقدرت اخبى حبى ليك
سالونى كتير كتير عليك وكنت بقول لا طبعا مبحبوش
وكنت بسال نفسى لية انت بالذات اللى بيسالونى علية؟؟؟؟؟
اسفة على لما كنت بتكلم معاك واغير فى الكلام
او تسالنى سؤال وارد عليك بسؤال
بس صدقنى دة كان غصبن عنى
كنت ببقى محرجة ومش عارفة اقول اية؟؟؟؟
وبعد ما يخلص الموقف الوم نفسى
اسفة لان انا اتجنبتك كتير
كنت بشوفك واعمل نفسى مش شايفاك
كنت بشوفك كتير قدامى ونفسى اتكلم معاك
او حتى اسلم عليك ومش قادرة
وارجع والوم نفسى تانى واقول ماكان قدامك
سامحنى على كل المتاعب اللى سببتهالك علشان اوصلك
هـــو انــا ضيعتــك مــن ايــدى
والاياترى كل دة كان وهم
وانت اصلا بتحب غيرى
والا من كتر ما فقدت الامل فيا قابلت غيرى وحبيتها
هتـــــرد وتقـــــــول ايـة
وانـــا كمـــــان
والا تعالى نبدا صفحة جديدة وننسى كل اللى فات
والا انا بحبك وعذبتينى كتير ومقدرتش اتخلى عن حبى ليكى
والا هتقولها ان كل دة كان وهم فى خيالك ومش عارف مصدرة اية
بس انا عمرى ما حبيتك والا حتى فكرت فيكى
25 comments:
دودة حبيبيتي
يمكن هو يكون حبك ولسه بيحبك
ويمكن انتي حبتيه وكابرتي وقولتي لاء
لكن يا دوده معتش ينفع الندم على حاجة عدت لو هو بحبك كان جه واعترف
او يمكن خاف تصديه ما انا عرفاكي
والواد يا عيني خاف ما انتى لو كنتي ادتيله فرصه كان اتنيل واعترف
انتى يا لولا الكومنت بتاعك بيقول ان البوست دة عليا
بطلى هبل
دة مجرد فكرة جاتلى وانا بذاكر ايام الامتحانات
وانتى عارفة طبعا ان الالهام مش بيجى غير ساعة المذاكرة
وانتى لو كنتى قراتى البوست كويس وفهمتية كويس مكنتيش هتكتبى الكومنت اللى انتى كتبتية دة
وانا قاعد اقرا البوست قولت لا يمكن يكون دا حقيقة اصل من واقع خبرتي القليلة مفيش بنت هتكتب او تتكلم عن هزيمة عاطفية او حتى مجرد انحناء للطرف الاخر
بحب كتير البوستات بالطريقة دي تحس انها بجد وهى اشتغالة لذيذة
بس كنت عايزه يكمل للأخر
يقولها حاجة من اتنين
*كان فى وخلص يا روحي ويغنيلها بتبعدني عن حياتك بالملل
*او يقولها اخيرا ويغنيلها اديني رجعتلك اديني بين إيديكي
بس ما بحبش النهايات السعيدة يبقي الاولي احسن
تحياتى كتير
تشي
كان واضح انه ماينفعش
لأنه نادر أوى لما واحده تعترف بحب
ولما قريت فهمت انه فكره وبس
بس حلوه بجد
اتمنى تشرفى مدونتى
غنى يابهيه
شكرا لزيارتك
اتمنى ان آخر بوست عندي وجدتي فيه الاجابه
ولو لم تجديها
فردي هو آخر بوست عندي
:)
تحياتي وأسلوبك جميل بجد
وانشاء الله أكون متابع
تحياتي
والله البوست ده جاي معايا ع الوجع
بس لو حصل اللي انت كتباه في البوست ده
يمكن ملحقش ارد لانه اكيد هيغمى عليا
بعد الكلمتين دول على طول
بس هو دايما الاعتراف بيكون بعد ما كل حاجة ضاعت
باتمنى ان ده ميحصلش مع أي حد
والله موضوعاتك بسيطة وجميلة وجريئة كمان شكلي كده هتابع المدونة دي
بالتوفيق دايما ويارب تكون نتيجة الامتحانات كويسة ونقولك مبروك
هو الكلام على مين؟؟؟؟؟؟؟؟؟؟
واللة كان نفسى اكتبلك كومنت يادودا عاجبنى البوست اوى بس بما انة مش عليكى يبقا
no comment..................
حبيبة قلبى مووووووووووووواااااااااااااااة
السلام عليكم
بصي يا دودا
أنا لو من البنت دي
وحسيت من البداية ان حد بيلمح
وأنا بحبه اصلا مش حصده
طيب بفرض انى صديته
و بعد ما صديته الولد بعد
وفقد فيا الامل
ولقيت انى فقدت حاجة كبيرة مكنش المفروض افقدها
ساعتها بقى مش حروح اقوله في وشه
بس حعمل الحركات اللي كان بيعملها زمان عشان يلفت انتباهي
طب بفرض اني رحت وقلتله
الكلام اللي فوق
مع انى مش بفضل ان البنت هى اللي تعترف
بس بنقول بفرض
حيرد عليا زى ما انتى كاتبة
لو قال وانا كمان يبقى خير وبركة
لوقال مكنتش بفكر فيكي اصلا
حقوله سوري يظهر انى غلطت في العنوان
باي باي وبألف سلامة
وا ستحالة استحالة استحالة ازعل على حد محبنيش لان نفسي غالية عليا اوي ولاني بحبني جدا
بس من البداية لا افضل اعتراف البنت
عشان ميحصلش حاجة تضايقني
سلاماتي:)
مع انى ولد ومبحبش فكره انى اتعاطف مع البنت مش عارف ليه لانى حاسس انها سهل جدا انها تلاقى الحب عن الولد بس ممكن هو فعلا بيكون بيحبك بس كبرياء
اول زياره ليكى
بس استمتعت اوى
شوفى ياستى
الحب مش محتاج مصارحه...لان البحب بيتحس الاول من الطرفين حد لحد كل طرف كيبقاش قادر يتحمله يقوم مصارح الطرف التانى علشان يشيل الحمل معاه
وبدل ما كل واحد بيحب التانى لوحد يبدوا لاتنين يحبوا بعض
يعنى الشخص الى انتى حبتيه جدا اكيد حس بحبك واى حد بيتحب بيحب بس مش بنفس درجه الشخص الى بدا يحب الاول يعنى متفاوت
اعتقد انه كمان بيحبك ومستمتع بمشاعرك المجانيه الى هو مش بيضطر يدفع فيها من مشاعره فى المقابل
فهمانى
ابدائى انتى احرميه منك شويه خليه يفتقدك شويه ويحس بمدى خسرته شويه
وقتها هيدور عليكى
اه مش هيقولك بحبك بسرعه لكن هيدور عليقى وهيلاقيكى
عاوزة امثله
مع احترامى طبعا لحبيبك
لو حضرتك حبيتى طفل صغنون عنده سنتين ولعبتيه وحنيتى عليه
مشاعر الطفل هتكون نحيتك ايه؟؟؟؟
سيبلك الاجابه
مثال تانى
برضو مع احترامى لحبيبك
لو حبيتى قطه او سورى كلب او معزة او عصفوره
وبداتى تاكليها وتحنى عليها وتحبيها
ياترى القطه هتحبك اوى ولا لاء
برضه سيبلك الاجابه
فى الاخر
هل مشاعر حبيبك اقل من مشاعر طفل عمره سنين؟؟؟
ولا مشاعره اقل من مشاعر الحيوانات الى ذكرناه؟؟؟؟
طبعا لاء
يارب يكون كلامى وصلك
المدونه رائعه
تحياتى
مرسى لكل واحد دخل البلوج وكتب كومنت
بس يا جماعة احب اقول تانى ان البوست دة كان مجرد فكرة يعنى مش عليا والا حاجة
اصل اكيد انا مش جريئة لدرجة ان اقول تجربة عاطفية على النت كدة قدام كل الناس
ومرسى تانى على الكومنتات
وانا بجد مبسوطة ان انا قدرت اكون صحاب فى الوقت القصير دة
اصحاب جامدين طبعا مش اى صحاب يعنى
مينفعش اشوف المدونة دي ومعلش بصراحة المدونة بتاعتك مع انها لسة فى بدايتها
بس انا شايف ان فى اقبال جامد عليها
وكمان كلامك عاجبني وخاصة اسلوبك وتنسيقك للكلام
ياريت اقدر استفيد منك
وبحب احيكي على مرورك فى المدونة الخاصة بيه
واتمنى ان دي متكنش اخر مرة
واحب اباركلك على المدونة ولو انها متاخرة حبتين
مع تحياتي
سمسم
ايود يا حبيبي
مش عارفه ليه كل مقرا ردك ببقى عاوزة اضحك
واعيط في نفس الوقت
اكيد انت عارفه ليه
دودا
حلو قوي الكلمات
وبعدين انا قريت ردك على لولا
مش علشان كاتبه برومانسيه قوي وبصدق قوي كده يبقى الكلام عنك
ممك الفكره تكون اثرت فيكي قوي
في حاجه شفتيها فكتبتيها كده
حلوه قوي
انا برده ساعات برد على بوستات ناس بتتكلم عن الظلم ويعجبني اني اتكلم كاني انا الشيطان في الموضوع وارد بلسانه
هي بتبقى بس مجرد احسساك بالفكره
بس بجد بقى تسلم ايدك
انا سعيد باني شفت مدونتك وبمعرفتك
سلاااااااااااااااااام
فى |أغنيه فى البوم نوال الزغبى اسمها تيجى منك .... اسمعيها جميله أوى وحتفيدك برده
بس عموما الواحد بيبقى محتار وخايف ومقلق من حجات كتير بيشفها فى الدنيا
بس بيرجع يقول الدنيا حلوه
حلو اوي البوست كفكرة
بس في حاجة عايزة اقولها
اذا كان في واحد بيحب واحدة وهي عارفة وكمان هي بدبادله نفس الاعجاب ف بيبان عليها مهما كابرت وعملت نفسها مش طايقاه
اوك
غير كدة اذا فعلا كانت هي مش طايقاه
هتصده ومش هتفكر تندم عليه
انما اذا كانت اكتشفت مؤاخرا انها بتحبه بعد فوات الاوان فاكيد اكيد هتلاقي طريقة تقوله كدة وترجعه تاني
بس الموضوع دا نادرا لانه في الغالب بيكون جاب جاز منها
ميرسي علي زيارتك يا جميل واتمني تكراريها
شكلك كدة جواكى فيضان رومانسية وينبوع حنان
كلامك حلو
ابقى زورينى بقة
شويـة ملح، وفلفل ... أوقات بيحلو ... الأكل .. و العلاقـة ....
حلو قووووي الإحساس ده ...
أول مرور لي من هنا
وشكله ماهيبقاش الأخير
انتى عندك احساس جميل جدا وانا من قراءتى التعليق اللى كاتباه " لولا " وردك عليه عرفت انه مش عليكى لكن وفيها ايه لو كان عليكى؟ اى بنت فى الدنيا وأى ولد كمان يحب الناس تحبه ويزعل جدا لو سابوه او حتى مفكروش فيه انا عارف ان ده كلام معرف لكن للأسف صعب حد يصوغه
تحيـــــــاتى
المصـــــــــــــــرى
بتحصل كتير
وبنكابر
بس بنيجى ونستسلم
احياناً يكون بعد فوات الآوان
واحياناً ف الوقت المناسب
أتمنى الوقت ميعدكيش
:)
نتي رحتي فين يابنتي
اديلك شهرين مش شيفينك
اظهر وبان عليك الامان
وحشتني مدونتك جدا
والحمد لله اهو انا وصلت بالسلامه
وابقي طمنينا
عليكي(بست وشز فور يو)0
حلو اوي الصراع الرومانسي ده
يسلم الهامك ياريت السنه كلها امتحانات
تقبلي مروري
هي عدوة نفسها ما سابتش اللي هي حاساه يطلع ولما أدركت الحقيقة كان خلاص كل حي راح لحاله
أسلوبك جميل ودي أول مرة ليا هنه و أعتقد اني ممكن أعدي مرة تاني
فرصه زي دي لازم استغلها طبعا
هو دي حاجه بتيجي بالساهل كده
لازم زي ما اتخنقت اخنقها
لكي مني كل التحيه
البوست هاااااااايل بجد جميل
فعلا في ناس بتبقى خجوله ومبتعرفش تتصرف في مواقف زي كده
ساعات بتهرب من الموقف بأي طريقه ممكن تجرح الي قدامها ومش بتاخد بالها وتندم على الي بيحصل بس بعد يكون فات اوان الندم
فعلا احساسك جميل
Post a Comment